Klippfisk og tilfeldigheiter

Det viste seg å vere arkiv etter tre ulike klippfiskeeksportørar i Ålesund, frå 1920 til 1950.

Då vi hadde fått ei betre oversikt over innhaldet, kontakta vi Rolv Petter Amdam, professor i historie ved BI, sidan han tidlegare hadde besøkt lesesalen vår og sett på liknande dokumentasjon.

No er arkiva brukte i artikkelen «When Trade Wars Heal: What History Teaches Us About Business Diplomacy and Resilient Supply Chains» publisert i ei spesialutgåve av det internasjonale tidsskriftet Journal of Management Studies. 

Artikkelen er skriven i samarbeid med Trudi Henrydotter Eikrem ved Høgskulen i Volda og forskarar ved University of York, England og Nova School of Business and Economics, Portugal, og Handelshøyskolen BI og handlar om konflikten mellom Portugal og Noreg om portvin og klippfisk.

Konflikten starta då Noreg innførte forbod mot import av heitvin som ein del av brennevinsforbodet. Portugal svara med å legge høg toll på norsk klippfisk, noko som brått avslutta eit handelsforhold som hadde vart i fleire hundre år.

Eit sentralt funn i studien er rolla til næringslivsorganisasjonar. I ein periode utan sterke internasjonale handelsinstitusjonar, fungerte eksportørar, importørar og handelskammer som diplomatar. Desse organisasjonane forhandla fram viktige avtalar, som Lisboa-avtalen i 1929, før styresmaktene sjølve fekk på plass ein bilateral handelstraktat i 1934. Dette viser at bedrifter og kollektive organisasjonar kan fungere som brubyggarar i tider med politisk spenning.

Dette syns vi er flott og ei forteljing om kor tilfeldig ting kan vere!